"അവൾ" [ഈ കവിത എഴുതിയത് മായാരാജേഷ് ,ഷാർജ. ]

[ സ്ത്രീയെ ബഹുമാനിച്ചു തുടങ്ങാൻ ഒരു പ്രത്യേക ദിവസം വേണമെന്നില്ല..അത് സ്വന്തം അമ്മയെ സ്നേഹിക്കുകയും ബഹുമാനിക്കുകയും ചെയ്യുന്ന എല്ലാവരിലും എന്നും ഉണ്ടാവേണ്ട ഒരു ഭാവമാണെന്നു ഞാൻ വിശ്വസിക്കുന്നു എല്ലാ കൂട്ടുകാർക്കും "ലോക വനിതാദിന ആശംസകൾ” ]

"അവൾ" 

വിശുദ്ധയാം ജനനിയാകാം അവൾ 
സ്നേഹവും കുറുമ്പും തുളുമ്പും ഭഗിനിയുമാകാം,
അതുമല്ലെങ്കിൽ സ്നേഹിതയോ,സത്സഖിയോ ആവാം
ചപലയാം കാമുകിയോ,സദാ പരിഭവിക്കും വിരഹിണിയോ ആവാം
അതുമല്ലെങ്കിൽ തൻ പട്ടട വരെ സന്തതസഹചാരിയാകും ധർമപത്നിയുമാകാം
ഇനിയൊ തൻ ജീവന്റെ കണിക കൊണ്ടുയുർപ്പിച്ച
പുണ്യവതിയാമൊരു പുത്രിയുമാകാം പിന്നെ
അറിവും പാണ്ഡിത്യവും നിറഞ്ഞൊരു മാന്യയോ
ഉന്നതപദവികളലങ്കരിക്കും മഹിളയോ,
ശാസ്ത്രത്തിനും ,കലകൾക്കും ഇരിപ്പിടമോ അവൾ
കഥകൾക്കും,കവിതകൾക്കും അമ്മ തന്നെയോ ആവാം
ഇതൊന്നുമല്ലാതെയിനി സർവവും ത്യജിച്ചോരു സന്യാസിനിയോ,
പശിയടക്കാൻ പാടുപെടും ഭിക്ഷുകിയോ ആവാം.

കണ്ണിൽ സ്നേഹിപ്പവർക്കായ് കണ്ണുനീരും,
നെഞ്ചിൽ തൻ കുഞ്ഞിൻ പശിയകറ്റാൻ മുലപ്പാലും ,
ചങ്കിൽ വിശുദ്ധപ്രേമത്തിൻ ചെന്ചോരയും ധരിക്കുന്നോൾ
എന്നിരുന്നാലും പ്രാണനിൽ ശക്തിയും തേജസ്സും നിറച്ചുള്ള
അഗ്നി തൻ ആത്മസ്വരൂപമായവൾ!

കറയില്ലാമനസ്സും,തെളിഞ്ഞ ബുദ്ധിയും കൈമുതലായുള്ളവൾ
കരുണയും,സഹാനുഭൂതിയും കവചമായുള്ളവൾ
ഒന്നും പ്രതീക്ഷിക്കാതെ നന്മകൾ ചെയ്യുന്നോൾ
ലോകത്തിനു മുഴുവനായ് നന്മയോതാൻ കഴിവുള്ളോൾ

ആരുമായ്ക്കൊള്ളട്ടേയവൾ അറിയുക നീയവളെ-
സ്നേഹിക്കാനും പോറ്റാനും,സഹിക്കാനും മാത്രമല്ല
സ്വയം എരിയാനും മറ്റുള്ളോരെ എരിക്കാനും കഴിവുള്ളോളെന്നു!

വന്നിടാം ഒരു നാൾ നിൻ മുന്നിലവൾ
ഏതു രൂപത്തിലും, ഭാവത്തിലുമീയുലകത്തിൽ
തിരിച്ചറിയുകയവൾ തൻ തേജോരൂപത്തെ
നേടുക അവൾ തൻ സ്നേഹാനുഗ്രഹാശിസ്സുകളെ..

നേടിയില്ലാ അതൊന്നുമെങ്കിലും നേടായവൾ തൻ ശാപകോപങ്ങളെ
കാരണം,
അവൾക്കു മുന്നിൽ നിന്ന് ഞെളിയാനാളി ല്ലൊരുത്തരും
ത്രിമൂർത്തികൾ പോലും ,പിന്നെയോ പാവമീ കലിയുഗക്കോലങ്ങൾ!